點解呢張表咁多人中招

喺我哋嘅經驗入面，稅局出得最快、罰款信出得最多嘅，就係呢張僱主報稅表。原因唔複雜：好多老闆收到之後見到封面寫住「僱主」，心諗「我又冇請人」，就順手擺埋一邊。過咗限期，罰款信好快就到——而且唔覆嘅話金額會一路升。

我哋每年都要幫唔少客寫求情信、解釋信去申請豁免。講句真心話：為咗一張填一分鐘就搞掂嘅封面而俾幾千蚊罰款，真係好唔抵。

「我根本冇請人，連我自己做董事都冇出糧」——就係呢一句令最多人中招。冇請人一樣要交，只不過喺封面填 0、簽名、寄返，全程一分鐘。

兩張表分別做咩

換句話講：56A 一定要交，56B 有幾多個有出過糧嘅人就交幾多張。冇人出糧，56B 一張都唔使，但 56A 照樣要填 0 交返。

時間線：幾時出、幾時交

呢一步實務上最花時間嘅唔係填表，而係執返成年嘅出糧紀錄：底薪、佣金、雙糧、花紅、津貼、實報實銷以外嘅補貼，全部要對得返數。好多客搵我哋就係卡喺呢度——尤其係中途有人入職、離職嘅公司。

IR56B 填表重點：三個最多人填錯嘅位

① 入息要填未扣強積金前嘅金額

表上面嗰欄係「薪金／工資」，指嘅係支付畀僱員嘅總額，唔係佢實收到手嗰個數。所以：月薪 $20,000、僱員自己供強積金 $1,000、實收 $19,000 嘅話，要填 $20,000。填咗 $19,000 就係少報，兩邊對數對唔上。

② 唔止底薪，全部都要計

• 底薪、雙糧、年終花紅
• 佣金、超時津貼、勤工獎
• 各種現金津貼（交通、電話、膳食補貼）
• 僱主提供嘅住所福利——要另外喺住所欄申報，唔係當現金入息
• 董事酬金／董事袍金——有獨立一欄

③ 身份證號碼同受僱期唔可以留空

僱員嘅香港身份證號碼、職位、受僱起訖日期都係關鍵欄位。有啲個人資料你真係唔知就可以留空，但身份證號碼一定要有，否則稅局配對唔到個人檔案，跟住就會有查詢信。

填完成張表，記住要蓋公司印同埋簽名——由董事、公司秘書、經理或者獲授權人士簽署都可以。冇簽名嘅表等於未交。

董事酬金：一欄好多小公司用得着

IR56B 中間有一欄係董事酬金（Director's fee）。同每月出糧唔同，董事酬金唔一定要按月派，可以喺年結之後、睇返全年盈利先決定派幾多。

實務上，好多一人公司或者小型有限公司會咁樣安排：公司賺到嘅利潤要交 8.25% 利得稅；如果將其中一部分以董事酬金或者薪金形式派返畀自己，呢部分可以喺公司帳目上列為開支，而個人嗰邊就按薪俸稅累進稅率計，用埋個人免稅額。兩邊加埋，總稅款有機會低過全部留喺公司。

但呢樣嘢一定要如實申報同埋有紀錄——董事會決議、實際過數、IR56B 上面申報，三樣要對得返。冇實際支付而只係「帳面派咗」，係另一回事。

每年年結嗰陣我哋都會問客一句：今年要唔要派董事酬金？派幾多？因為呢個決定同時影響公司利得稅同你個人薪俸稅，唔可以等到報稅表填到一半先諗。

仲有幾張表唔好漏

⚠️ IR56G 最容易出事：員工話下個月移民走，你照出糧俾佢，佢走咗之後稅局追唔到人，就會追返僱主。條例要求僱主喺收到「同意釋款書」之前，唔可以支付任何應付僱員嘅款項。

唔交同交錯，後果有咩分別

• 唔交：無合理辯解不遵從規定，可被罰款；實務上見到嘅罰款信由 $1,200 起，唔理會再升。法例上最高可罰 HK$10,000。
• 交錯／漏報：如果涉及少報僱員入息，除咗罰款之外，稅局可以按《稅務條例》評定補加稅。
• 完全冇申報僱員：屬於較嚴重嘅情況，稅局有機會由僱員嗰邊反查返公司，順帶檢視你嘅帳目同開支——即係一張表引發一次全面查閱。
• 求情有冇用：有。實務上我哋幫客寫過唔少解釋信，如果係首次違例、有合理原因兼且即刻補交，有機會獲減免。但唔應該當成常規。