三樣嘢，一個都唔可以漏

好多老闆請第一個人嗰陣，只諗住「出幾多糧」。實際上僱傭關係一成立，法例就掛咗三條責任落你身上，而且三條都獨立、三條都有刑責。

留意第三行。《稅務條例》第 80(1) 條訂明，任何人作為僱主，無合理辯解而不遵照第 52(2) 及 (4) 至 (7) 條嘅規定，可被判處罰款 $10,000，而法庭可命令被定罪嘅人喺指明時間內將未辦妥嘅事項辦妥。

強積金：邊個要供、供幾多

邊個要參加

• 年滿 18 歲至未滿 65 歲
• 連續受僱 60 日或以上（全職及兼職都計）
• 僱主須喺僱員首 60 日服務期內完成登記
• ⚠️ 「連續受僱 60 日」係一個容易被誤解嘅門檻——唔係「做夠 60 日先開始計」，係一達到就要追溯處理。臨界個案建議問清楚

供幾多

僱員收入低過下限唔使供，唔代表你唔使供。呢一格漏咗，就係欠供款。

另外要知：拖欠供款會被徵收欠款 5% 作為附加費，而且積金局會公開違規僱主及高級人員紀錄。呢個紀錄係公開嘅，將來投標、申請牌照、甚至銀行盡職審查都可能被人查到。

勞工保險：唔係「買咗穩陣啲」

呢一點要講白：冇為僱員投購勞工保險係刑事罪行，唔係行政疏忽。

而且風險唔對稱得好誇張。一單工傷嘅賠償金額，可以係保費嘅幾百倍。冇保險嘅話，全數由公司同東主承擔。

行業風險高嘅（工程、裝修、飲食、物流、美容），保費自然貴啲——但呢個正正係反映真實風險。因為保費貴而唔買，等於用最大嘅風險去慳最細嘅錢。

呢度亦帶出一個更根本嘅問題：如果你嘅行業有實質人身風險，你更加應該用有限公司經營。 無限公司東主承擔無限責任——賠償賠唔完，係跟一世嘅。有限公司嘅責任同你個人分開，就算最壞情況要清盤，受傷嘅僱員仍然可以循僱員補償基金嘅機制尋求賠償。

出糧：現金、支票定過數？

答案好明顯——銀行過數。理由唔止方便：

• 會計同報稅時每一筆都對得返，唔使年尾先翻查
• 同員工出現金錢糾紛時有紀錄可依
• 銀行見到公司戶口有規律嘅出糧紀錄，係公司正常經營嘅正面證據

但實務上，有啲行業（例如工程、裝修）真係難免要出現金畀散工。呢個情況下：

• 每個月要有總匯紀錄——邊個、幾多錢、咩日期。
• 最好出糧單畀對方。 勞工法例本身亦有相關建議。
• 保存好單據。 冇紀錄嘅話，一來影響你報稅（年尾根本唔記得出咗幾多），二來有糾紛時你完全冇嘢企。

最實際嗰一條：散工話「我唔想報稅」

呢個係做開工程、裝修、活動、飲食嘅老闆最常撞到嘅情況——對方要求出現金，唔想留紀錄。

你要知道呢件事嘅實際結構：

一筆錢由 A 付去 B，稅局總之要喺當中收稅。 問題只係——收公司嘅稅，定係收嗰個人嘅薪俸稅。

如果對方唔申報、你亦冇正式紀錄，咁呢筆錢唔可以作為公司支出扣減。

計一計就好清楚：你出咗 $200,000 畀散工。有正式紀錄嘅話，呢 $200,000 係支出，可以扣減。冇紀錄嘅話，呢 $200,000 變成你嘅應評稅利潤，按有限公司首 200 萬 8.25% 計，你要多交約 $16,500 稅。

對方唔想交嘅稅，唔會消失。佢只係轉移咗去你度。

所以「出現金畀佢，大家慳返」呢個諗法係錯嘅——慳嘅係佢，蝕嘅係你。 傾價錢嗰陣，呢一點應該一開始就講清楚。

老闆自己點攞錢？

你係股東兼老闆，公司賺咗錢，你自己點拎出嚟用？兩個常見方法：

兩種方式最終都計入你嘅薪俸稅。實務上好多老闆會用出糧方式，因為除咗公司可以扣減支出，個人嗰邊仲有免稅額同各項扣除可以用——喺免稅額範圍內，實際薪俸稅可以好低甚至係零。

⚠️ 但點樣安排最有利，要按你嘅整體收入、公司利潤水平同家庭狀況計。呢個唔應該靠估，值得搵專業意見計一計。

僱主報稅要交邊啲表、幾時交，報稅系列第三集。

一年之內要做嘅事